3/13/2013

與軟硬在紅館台上相認, 勁開心!!! (有片睇版本)


7月31號係我睇軟硬第二次, 上個禮拜五28號又睇咗次, 係張學友做嘉賓, 笑到死咗, 估唔到學友噉玩得, 仲唱咗3隻歌啦...



軟硬個show就唔洗講啦, 一個字"正". 好笑到爆, 好耐無試過笑到喉沙哪. 氣氛又好, 無睇過嘅人一定要買隻碟睇. 佢倆個嘅威力真係勁.

而係每一場去到中段, 佢哋講開係商台好開心識咗d好支持佢哋嘅人, 每次都有提起我個名"玻璃朱", 真係令到我好開心. 但估唔到今日仲係紅館台上相認咗...

我之前送咗個果籃比佢哋, 話佢聽我今晚會再去睇佢哋, 叫佢哋加油. 去到嗰part, 阿葛一講到我個名"玻璃朱", 阿jan就話"我收到訊息佢今晚嚟咗...", 我即大叫"係哩度", 跟住企起身係度跳... 佢哋係度搵我, 搵咗幾秒終於望到(我坐第十行), 仲有個spotlight照住我啦..., 當然首先又取笑吓我話我衣著性感(我著黑色小背心), 話我件衫拉高又露下面(肚臍), 我拉低又露上面(心口)...哎...笑死. 跟住佢對住全場觀眾講, 哩個就係當年我哋第一個節目, 第一個打嚟, 同埋第一個問佢"可唔可以同我傾吓電話"嘅玻璃朱, 跟住d人拍掌. jan話因為我係佢哋第一個fans, 所以特別記得我...阿葛跟住就話"係呀, 我記得佢住上水啦, 成日都同講要趕尾班車番屋企..."! 之後阿jan同我講"你可以坐番低哪..." 之後唔知講咗句咩d人就大笑...聽唔到啦, 睇嚟又係講鹹濕嘢...不過我真係好開心, 開心到暈....

去到尾聲, 佢哋又再次多謝各位fans支持, 阿jan話知到好多個由13歲支持到31歲(我正係啦!), 又話見到大家由細細個聽軟硬, 到而家著晒西裝番工忙碌...跟住阿葛話"頭先個玻璃朱, 上次佢比張咭片我已經做到副總裁哪...", 阿jan又攞我嚟講笑話" 可能係深圳二百蚊印一盒嗰d咭片..." 哈哈, 笑死我...不過真係好開心, 又係台到提起我...攪到我high得嚌撞到隻腳流血啦...

今晚我真係興奮到瞓唔著啦...好彩過程我男友幫我錄起咗, 可以比個美好嘅回憶我留念...
軟硬die hard支持你!!!

當時嘅片段...
同軟硬嘅相識...

沒有留言: