今日, 係同一日入面同3個我識咗好耐嘅artist重逢. 知道軟硬同黎明一様都喺世貿有press con, 一於去探吓班. 今日見到佢哋, 仲無啦啦比阿JAN隊咗個電話比我做商台直播訪問; 真係好開心...
識軟硬係1988年嘅事, 當年13歲的我因為參加"新一代DJ選拔賽"而識佢哋. 之後仲因為個個禮拜六上去電台錄"飛越癲狂院"而熟悉. 因為發覺佢哋轉數好快, 更加上永遠係潮流尖端而鍾意咗佢哋, 而成為佢哋NO.1嘅頭號FANS. 但佢哋對我都當係朋友, 成日同我傾電話, 又會一齊去飛吓車. 阿葛手車好勁架...
開頭同阿JAN熟D, 嗰時阿JAN做”軟硬天師講鬼故”, 我晚晚節目完都會打去. 阿JAN接到我電話, 會HOLD起, 然後聽晒D聽眾講完鬼故就會同我傾陣計先走.最長試過半個鍾, 最少都有5分鍾. 直至有一晚, 佢同我傾完計後, 同我講話佢朋友阿葛唔開心, 因為成日朝早遲到報唔到馬路天使, 所以今晚要留係商台瞓. 叫我不如同佢傾吓計開解吓佢...結果同阿葛一傾就傾咗4粒鍾, 成4點先收線. 之後就同佢都熟絡咗哪...
我可以講係佢哋第一個DIE HARD FANS, 熟到連佢哋嘅屋企電話同地址都有. 如果佢哋當年攪fans club, 我一定做會長．．．可惜無攪．佢哋嘅ｅｖｅｎｔ我全部都有去，大約兩年到，人大了也沒有再在廣播道等待了，便成了背後默默的支持ｆａｎｓ，一樣有買他們的碟，看他們的節目及戲．．．想起當年追星嘅日子，雖然好像有點幼稚，但追隨軟硬實在帶比我有好多開心嘅童年回憶．．．之前最後一次一齊見軟硬係９５年，當年仲係做記者，係個ｅｖｅｎｔ見到佢哋．亦試過係多年前吃飯分別撞到佢哋．直至今天，大約也有十年無見了，不經不覺已識咗佢哋１８年哪．．．
今日見到佢哋，一路做訪問其間，阿ｊａｎ已經見到我同我點頭打招呼．其實想同佢哋打個招呼比番張咭片比佢哋ｋｅｅｐ ｃｏｎｔａｃｔ．到阿ｊａｎ做緊商台”五天精華遊”節目直播電話訪問時，我比手勢阿葛話比張咭片佢，佢就叫我入去佢哋間房．雖然同阿葛噉耐無見但仲記得我，同佢講我做咗股票十年，佢見我將咭片係副總裁都嚇咗一跳．．．一路傾緊嘅時侯突然阿ｊａｎ對電話內講：”而家係我面前係間鋪第一個客，亦係當年老人院第一個打嚟嘅聽眾ｂｏｎｎｉｅ，佢今日又噉巧係度，又著到鬼死噉靚又低胸（？？？），不如你問吓佢對我哋間鋪有咩感覺哪．．．？” 之後就隊咗個電話比我，好彩我都有ｄ急才，芝ｃ菇ｂｅｅ同余廸偉問我對軟硬嘅感覺，同形容吓間鋪同ｄ衫．．．阿葛係後面解話：１９８８啦玻璃朱．．．段訪問好攪笑，之後我隊番個電話比阿葛．同阿ｊａｎ傾咗陣計，好開心．．．佢哋仲送咗張親筆簽名海報比我啦．．．我亦同佢哋講我已經訂咗飛睇你哋個ｓｈｏｗ，叫佢哋加油．之後仲同我影咗張相啦．．．死人阿葛又做埋晒ｄ鬼五馬六嘅表情，激死．．．但係噉耐無見再見番真係好開心．．．軟硬永遠支持你！！！
至於黎明，係喺做９３年記者時識嘅．佢當年對我好好，成日都比ｄ獨家料我出，我同佢成隊ｃｒｅｗ好似助手子泉，化妝小偉，髮型ｓｅｖ一直都幾ｆｒｉｅｎｄ．當年因為有蘋果日報，狗仔隊令到ｄ記者不被專重，所以我於９５年亦離開了轉投股票至今，不經不覺都識咗１３年啦．但念舊長情的阿黎也一直有跟我聯絡，間唔中也有去探佢班．唔似得有ｄ ａｒｔｉｓｔ，你做記者有利用價值就同你ｆｄ，一無做記者就第二個樣．．．佢人邊ｄ人跟咗佢十幾年，我得閒都會同佢哋食宵夜吹吓水．
上次見阿黎係crazy classics演唱會後台探班，跟住係１２月２３號又係ｓｕｇｅｒ撞到佢同佢飲咗兩杯，我嗰日都飲到ｈｉｇｈ ｈｉｇｈ哋．．．
今日打比子泉，知佢５點有ｐｒｅｓｓ ｃｏｎ，佢都叫我去探吓班，順便飲杯茶．去到見到阿黎，因佢急住走，同佢寒暄咗兩句．之後就同小偉，ｓｅｖ同子泉去茶餐廳飲茶．因為一排無見，都幾多嘢傾，之後子泉仲車咗我去金鍾食飯啦．．．ｔｈａｎｋ ｕ晒．
今日真係好開心啦．．．
沒有留言:
發佈留言