上年, 第一次去北海道. 始終地方又大又不熟, 所以選擇了跟團. 今年, 全程自己一手安排. book酒店, 租車, 訂機票, 自己駕車真係十分過癮. 行程首先會係留壽都渡假村過兩晚, 滑雪為主. 之後一晚駕車落小樽一間溫泉酒店, 享受溫泉. 之後再到札幌過一晚, shopping美食. 最後一天晚機回港...一行4人有我, Ivy, Peter 同 Lilian. 五日四夜的北海道之旅, 正式開始...
12月24日 凌晨3時
由於我哋係加班機, 所以半夜3點半起飛. 到達北海道是早上9時, 可謂玩足5日. 好彩係飛機上睡得了, 要不然一落機仲要揸長途車都幾係嘢. 我經Nippo Rent a Car租咗一架車, 去到新千歲機場攞車, 都好方便. 由租車公司出發, set好個衛星導航, 只要輸入目的地個電話號碼, 條路就即刻顯示出嚟...十分易用.
由機場去留壽都要2個小時車程, 由於當日早上大風雪, 飛機也延遲下降. 從未試過在雪地上駕駛的我當時都有d擔心, 好彩以我多年的技術仍可應付自如. 雪上揸車亦唔係我想像中噉難. 中途, 我們亦停了在一些路旁的咖啡店, 提提神休息一吓, 仲忍唔住食咗個拉麵, 不過只是普通. 大約下午一時, 我哋順利到達留壽都Rusutsu.
Check in 後, 大家都急不及待去滑雪了, 由於大家也只是初心者, 所以都選擇了ski. 足足一年無玩, 唔知仲得唔得. 買個半日pass就上咗山頂試吓, 好彩都無咩退步. Peter同 Ivy 就喺下面暗斜的地方pick up吓先. 而Lilian因腳傷關係, 所以無得滑雪, 全程得個睇字.
我滑咗幾轉, Peter 同 Ivy都跟埋一齊上山頂試吓. 由於剛下過大雪, 雪面十分粉狀, 令滑雪者更易剎停, 就算跌亦不太痛. 大家都玩得好開心, 不知不覺都玩到天黑. 原來下午4點幾就開始天黑, 好彩個場有夜燈照明, 結果大家玩到7點幾先收手.
之後我哋去大浴場沖涼, 浸溫泉. 真係舒服到爆. 之後再去食晚飯, 哩度佢哋會包埋早, 晚餐, 有十幾間餐廳任你選, 有日有西. 我哋選了日本餐廳, 有魚生有蟹有和食, 十分不俗. 經過一日嘅運動, 真係特別好胃口. 食完飯, 該酒店由於係聖誕節關係, 仲放煙花啦. 雖然唔係香港d噉大, 但都好靚啦. 睇完煙花, 大家都番房瞓覺了...
12月25日
第二天早上十點幾先起身, 過晒早餐時間. 我哋選了在附近的一間西餐廳飲咖啡. 點知張早餐卷仲可以用嚟換同等價錢嘅食品, 我叫咗個海鮮意粉, 當食埋午飯. 之後, 再去滑雪. 今次我選咗玩Snow board, 成日覺得人哋玩得好鬼型, 我又有多年wakeboard經驗, 而之前係星加坡學滑雪時都見到人哋學snoｗ board嘅基本嘢，應該都ok啩，就膽粗粗去咗試．開頭唔敢上山頂，行上斜路滑番落嚟．累到死．結果唔理照上山頂，不過今次搵咗條易ｄ嘅雪道．搭吊車上去，開頭唔識落，成日跌倒．不過滑落去又唔難，好易pick up，好好玩．玩多幾轉都已經似模似樣．後來Ivy嚟搵我，都話估唔到我噉勁．
之後慢慢玩多ｄ唔同嘅turn，發現玩snow board都會跌到個pat pat幾痛，可能又加上無雪落啦．不過我真係好鍾意，以後都唔打算玩番ski囉．
玩足一日，成６點幾，又去大浴場沖涼浸溫泉．之後選咗間日本鐵板燒嘅餐廳食晚飯．真係好好味，個set又有魚生又有鐵板燒，ｄ帶子又大隻又新鮮，又有大蝦又有牛又有燒三文．Yummy...食完飯又回房瞓覺囉．
12月26日
早上食過早餐自助餐，便向下一個目的地小樽出發了．由留壽都駕車去大約要個多小時, 我們check out 後大約下午1點多到達. 聽聞小樽有一條好出名嘅壽司街, 我哋就選咗間歷史最久最出名嘅"政壽司"試吓哪. 店內多數都係香港人, 可能d旅遊書推介得多啩. 我哋order咗响螺, 鮑魚, 牡丹蝦, 海胆...好正, 未試過食生鮑魚係唔硬嘅, 係好爽甜. 未試過食隻牡丹蝦仲係生勾勾, 個肚仲有春, 又大隻. 師傅仲將個頭拆埋膏出嚟比你食, 好正. 而北海道嘅海胆你比加拿大嘅淺色同清甜同細隻, 我個人比較鍾意加拿大嗰d. 不過大家千其唔好叫佢d魚, 左口魚都ok, 最差係toro, 油金魚, 又無光澤又唔新鮮. 始終唔係佢哋產地, 真係唔係好掂.
食完壽司就係小樽觀光, 都係買吓朱古力, 餅乾, 行吓音樂盒shop哩d大路嘢. 不過沿路有好多海鮮檔, 佢哋d燒帶子, 燒螺真係好鬼好食, 一定要試. 之後, 去埋小樽運河影張相, 便揸車去酒店.
今次嘅酒店係位於小樽朝里川嘅"宏樂園", 係我特登搵嘅, 因為佢有十間唔同樣嘅私家露天溫泉房間, 可以跟愛人一齊浸, 唔駛男女分開噉悶. 另外佢仲有四個公用露天溫泉同四個室內溫泉. 我哋大約五點到達, 之後就一齊去浸佢d公眾溫泉, 之後再浸自已個私人溫泉. 真係好正, 可惜無落雪, 唔係仲正.
房間外的私人露天風呂, 真係好正好好feel, 極力推介.
7點半係房內一齊食晚飯, 有鮑魚海胆, 魚生剌生, 北海道蟹同一d和食. 不俗不俗. 一路食飯一路飲sake, 好開心. 食完飯d人入嚟收拾清潔, 然後鋪出Futon(Tatami). 本人十分鍾意瞓, 好鬼死舒服.
之後我哋繼續飲酒傾計, 大家仲興起話著住泳衣男女一齊浸溫泉一路飲sake啦. 四條友一路浸一路傾計, 好鬼開心. 飲吓飲吓Peter都頂唔住要瞓先, 淨番我哋3條女著番浴衣繼續飲, 結果飲到2,3點先瞓.
12月27日
早餐時間7至9點, 瞓到過晒龍. 9點50分突然打嚟話完來係十點鍾check out即刻嘭嘭聲起身收拾行李, 真係唔知會噉早check out, 想浸多轉溫泉先走都無時間...慘!
早上開始下雨, 揸車要更加小心. 我哋由小樽去札幌, 大約要1個小時. 我今次選一間好普通嘅酒店, 係薄野附近, 方便shopping食嘢. 12點幾泊好車, check in後出去行吓搵嘢食. 可惜天公不做美, 繼續落雨, 要問酒店借遮. 我哋去拉麵橫町, d鋪都未開, 後來搵到間叫"山頭火"嘅拉麵店. 係香港嗰間我食過好好食, 即入去試吓. 真係好可惜, d麵質唔得太"林", 湯太肥太油. 好失望...
之後, 就一路shopping, 由朝行到晚, 我就買咗好多嘢, 佢哋就買唔到. 晚飯係札幌車站附近嘅火煱燒烤店食和牛, 真係好好味, 但真係太油, 飽到個肚好辛苦. 之後買咗梅酒番酒店飲, 我就無咩飲因為個肚唔舒服, 最後仲嘔番晒出嚟, 之後當堂舒服晒...瞓覺哪...
12月28日
食過酒店早餐, 又去行街街. 去咗行狸小路, 跟住去二条市場, 係一個海鮮市場. 見佢有d即開即食海胆, Y$500一隻, 咪試吓囉. 哎...唔掂! 之後再去行Tokyu hand, 同d百貨公司, 唔覺唔覺又3點幾. 之後我哋就揸車往機場附近的租車公司去, 車程大約1小時. 還車後坐番佢哋d專車去機埸, 我哋嘅旅程亦都完成. 我決定每年冬天都要再去北海道滑雪啦! I love it!!!
朱庭萱(玻璃朱)
沒有留言:
發佈留言